LAOAG CITY – Maysa ti pimmusay ken dua ti nasugatan iti napasamak a desgrasya iti Barangay 10 iti ili ti Sarrat.
Segun kenni Police Chief Master Sergeant Meynard Adina, imbestigador ti Philippine National Police iti ili ti Sarrat, ti pimmusay ket agtawen ti 26, awanan ti asawa ken residente iti Barangay Pacifico iti ili ti Marcos, ken driver ti motorsiklo.
Naamoan a ti driver met ti kurong-kurong ket agtawen ti 42, ken residente iti Barangay Baresbes iti ili ti Dingras.
Inlawlawag na nga agpaamyanan ti kurong-kurong idi dinungpar ti motorsiklo a sumararuno kenkuana.
Kunana a nakasuot met ti helmet ti nakamotorsiklo ngem idi inikkat da daytoy ket adda ti rumuar a dara iti agong na.
Dagus met a naitaray dagiti biktima iti ospital ngem naideklara a dead on arrival ti driver ti motorsiklo.
Kabayatanna, inbatad ti Mrs. Marietta Agustin, ti kabsat ti maysa kadagiti biktima a mapan kuma agideliver ti lako da a kumatig iti San Nicolas idi dinungpar ti nakamotorsiklo.
Naamoan nga ita nga aldaw ket dumalan iti CT–scan ti kabsat na gapo ta adda ti sugat iti ulo ken namin-dua a daras a nagbakwar ken adda ti rimuar a dara manipud iti lapayag na.
