LAOAG CITY – Inbilin dagiti huwes iti International Criminal Court (ICC) ti espesyal a medical accommodation para ken ni dati a Presidente Rodrigo Duterte iti uppat nga aldaw a confirmation of charges hearing intono Pebrero 23,24, 26 ken 27, 2026.
Basar iti pammilin ti Pre-Trial Chamber I, limktaran iti tallo nga oras iti kada aldaw a panagdengngeg ken maaddaan ti inoras a panaginana tapno maliklikan ti pisikal a pannakabannog ti dati a presidente, basar iti rekomendasyon dagiti doctor ti International Criminal Court Detention Centre.
Inpetteng dagiti huwes ti prinsipyo ti hustisya ken panagpapatas ti agsinumbangir a partido, isut gapuna nga ad-ado nga oras ti nailatang iti depensa.
Ti depensa ket naikkan ti 3 nga oras ken 30 a minute a presentasyon, ikumpara iti 2 nga oras ken 30 a minuto para iti prosekusyon, idinto a ti mangibagi kadagiti biktima ket addaan ti maysa nga oras ken 30 a minute.
Amin a partido ket addaan ti sagtallo-pulo a minuto nga opening ken closing statements.
Igiddan metten ti International Criminal Court ti tinawen a panagdengngeg iti panangtingiting ti detensyon ni Duterte iti maudi a sesyon intono Pebrero 27, no sadinno a mangisumitir ti oral arguments ti prosekusyon, dagiti biktima, ken depensa.
Nupay kasta, basar iti International Criminal Court, mabalin pay a mabaliwan ti schedule, depende iti taray ti panagdengngeg ken mabalin a mangrugi a dagus ti sumaruno a presentasyon no adda ti malpas a nasapsapa.
