LAOAG CITY – Nakasaganan a maideploy dagiti medical team ti Quezon City Health Department iti maikatlo nga State of the Nation Address wenno SONA ni Presidente Ferdinand “Bongbong” Marcos Jr., inton Lunes, Hulio 22.
Kinuna ni Dr. Tina Marie Sanchez-Lucilla ti Quezon City Health Department a panggepna a suportaran dagiti agkasapulan iti maitutop a medikal nga atension.
Naamuan a dagiti medical teams ket aggapu kadagiti health staff ti Quezon City run hospitals kas iti Maclang Hospital, Novaliches District Hospital, Quezon City Hospital malaksid iti East Avenue Medical.
Nagbalakad met ti ahensya nga agtalinaed a hydrated tapno maliklikan ti panagulaw bayat ti aktibidadda.
Malaksid dagiti medical team ket nai-deploy metten ti Armed Forces of the Philippines (AFP) ti Joint Task Force-National Capital Region (NCR)-da para iti mapaspasangasangan a maikatlo nga State of the Nation Address (SONA) ni Presidente Marcos.
Segun kenni Armed Forces of the Philippines Public Affairs Office Chief Colonel Xerxes Trinidad, 500 a personnel ti Joint Task Force- National Capital Region agraman ti dua nga armored vehicles ti naidestino a pangsuporta iti puersa ti Philippine National Police (PNP) a mangbantay iti seguridad iti SONA.
Kabayatanna, inkari ti Armed Forces a makipagtrabahoda iti National Police tapno masigurado ti naannayas ken natalged a SONA 2024.
