LAOAG CITY – Nagtalinaed iti kustodyar iti Philippine National Police (PNP) iti ili ti San Nicolas ni Keneth Galacgac, agtawen ti 28 awanan asawa , mekaniko, ken residente ti Bgy. Tabug idiay ciudad ti Batac.
Daytoy ket kalpasan a natiliw idi kalman iti drug buy-bust operation babaen ti napagtipon a puwersa ti PNP Prov’l Office Drug Enforcement Unit, PNP-Batac, Paoay ken San Nicolas idiay Barangay Tabug, Batac City.
Nakumpiskar ti ikot ti suspek ti maysa nga heat seald plastic sachet a naglaon ti maatap a shabu ken ti buy bust money ken sabali pay a pito a babassit a sachet a naglaon met laeng ti maatap a shabu.
Malaksid kadagitoy, naala pay iti ikot ti suspek ti maysa a paltog a kalibre 45 ken dua a magazine ti nasao a paltog a naglaon kadagiti bala ken bala ti kalibre 38 ken ti kwarta na a 128 a ribo a pisos.
Naamoan a ni Galacgac ket maysa a drug surrenderee iti PNP-Batac.
Ni Galacgac ket sumango ti kaso a panaglabsing ti Republic Act (RA) 10591 ken ti Republic Act 9165.
