LAOAG CITY – Kinumpirmaran ni Pol. Lt. Tolentino Erum Jr., chief of police ti PNP-Piddig ti panagpakamatay ti maysa a babai a menor de edad iti nasao nga ili.
Segun kenni Erum, iti imbestigasyon da ket naamoan da a binagbagaan ti ina ti ubing a tumulong iti trabaho iti uneg ti pagtaengan ken saan laeng a ti cellphone ti as-asikaswen na.
Inlawlawag na a mabalin a napauyo ti biktima ken napan iti balay ti lola na, ken idi nakasangpet ket binaon na ti baket a mapan gumatang ti agas gapo ta inbaga ti menor de edad nga agsakit ti buksit.
Nupay kasta, kalpasan ti agarop 30 a minutos ken nagsubli ti lola iti balay na ket nakita nan a nakabitin ti apoko na.
Inbatad ni Erum a nakita da iti wallpaper ti cellphone ti biktima ti panagpadespensar ken panagayat na iti ama na.
Kunana a mabalin a a naluksaw ti ubing iti pammagbaga kenkuana ti ina na.
Iti agdama ket agtultuloy pay ti naun-uneg nga imbestigasyon da gapo ta agpapan ita ket awan pay ti maibaga da no adda ti naun-ueng a rason iti panagpakamatay ti biktima.
