LAOAG CITY – Kinumpirmaran ni Mrs. Luzviminda Herardo iti Barangay 17, San Francico ditoy ciudad ti Laoag a positibo iti dengue ti apoko na nga iti agdama ket naka-confine iti Gov. Roque Ablan Senior Memorial Hospital.
Segun kenni Herardo, naggurigor, naglammin ken nagsakit ti buksit ti apoko na ken idi adda iti ospital ket namin-dua a naipadalan iti test ti dara daytoy ken kumpirmado a biktima daytoy ti dengue.
Inlawlawag na a saan met a rumrumuar ti apoko na gapo iti naiget a restriksyon ken patien na a posible a gapo iti panagpuypuyat daytoy kadagiti modules na ket bimmaba ti blood pressure na.
Inbatad na nga asideg iti kanal ti pagtaengan da.
Mainaig iti daytoy, kuna ni Barangay Kagawad Loida Garcia, chairman ti Committee on Health iti barangay da a nakigtot idi naamoan na nga adda ti biktima ti dengue iti barangay da ken daytoy ti kaunaan a kaso iti lugar da ita a tawen.
Kunana a maminsan iti makabulan ket agdalos da iti barangay da kangrunaan na iti kanal.
Inpalgak met ni Barangay Kagawad Benedick Roldan a nabayagen a barado ti kanal iti sangwanan ti pamilya ti pasyente.
Gapo iti daytoy, agkiddaw da iti City Health Office (CHO) para iti pannakadisinfect ti aglawlaw.
