LAOAG CITY – Adda ti dua a torneo pay a pakipasetan ti Philippine men’s national football team (PMNT) kas paset ti panagsagsagana iti 2024 AFF Mitsubishi Electric Cup.
Umuna a sumabak ti koponan iti Merdeka Cup a mangrugi inton Setiembre 2 agingga 10 idiay Kuala Lumpur, Malaysia.
Kalpasan daytoy ket sumaruno ti King’s Cup a mangrugi inton Oktubre 7 agingga 15 idiay Thailand.
Iti nasao a torneo ket makasango ti Pilipinas dagiti addaan ti nangato a ranking.
Adda iti ranked 147 ti Pilipinas a makabinnalubalna ti ranked 102 a Tajikistan, ranked 117 a Lebanon ken ranked 135 nga host country a Malaysia iti Merdeka Cup.
Idinto iti King’s Cup a makalabanda iti ranked 93 a Syria, ranked 100 a Thailand ken ti Tajikistan.
Sakbay ti FIFA International window a mangrugi manipud inton Nobiembre 11 agingga 19 a ti maysa ket maiyuswat ditoy pagilian no sadino maaddaan ti dua a friendly match ti pagilian.
Inbatad ni Philippine Football Federation director of national teams Freddy Gonzalez a nakaplastaren ti iskedyul ti men’s football team ti pagilian sakbay ti international tournament.
Makasango ti Pilipinas ti Myanmar inton Nobiembre 27 ken Vietnam inton Disiembre 3 a maangay iti Rizal Memorial Stadium para iti Southeast Asia’s premier football tournament nga AFF Mitsubishi Electric Cup.
Kalpasan daytoy, makalabanda ti Indonesia inton Disiembre 7 a maiyuswat idiay Jakarta.
