LAOAG CITY – Inrakurak ti Mexico ti pannakaipawil ti panagusar ti cellphones kadagiti pagadalan iti elementarya ken sekondarya iti intero a pagilian.
Iti panagbitla ni President Claudia Sheinbaum, inbatad na a gagem ti nasao nga addang ket tapno matulungan dagiti ubbing nga ag-pokus iti panagadal da imbes a nakatutuk da iti social media.
Ti pannakaipawil ti agusar ti cellphone kadagiti pagadalan ket agepekto intono Nobyembre ita a tawen no sadinno naiget a mamonitor dagiti estudyante.
Nupay kasta, ti restriction ket saan a maiyaplikar kadagiti estudyante nga addan iti maudi a tallo a tawen sakbay a sumrek da iti kolehiyo.
Mainaig iti daytoy, inbatad met ti Education Ministry a 81 a porsiento kadagiti mangisursuro ti nangibaga a ti pannakaipawil ti panagusar ti cellphone kadagiti pagadalan ket nakapatpateg nga addang.
Maipalagip nga immunan a nangipatungpal dagiti pagilian manipod France agingga iti New Zealand ken Peru ti nangipatungpal iti kastoy nga addang.
