LAOAG CITY – Pinuted ti Mexico ti relasyon na iti Ecuador kalpasan a rinaot dagiti otoridad ti Mexican embassy iti Quito tapno makemmeg ni dati nga Ecuadorian Vice-President Jorge Glas.
Inpetteng ni Mexican President Andrés Manuel López Obrador a pwinersa pay dagiti otoridad ti napan simrek iti embahada a nalawag a mailabsing iti international law.
Nagkamang ni Glas iti embahada idi Disiembre iti napalabas a tawen kalpasan a nangipaulog ti Ecuador iti arrest warrant kontra kenkuana gapu iti maipagarup a panagkunniber.
Mainaig iti daytoy, ipetpetteng ti abogado ni Glas nga inosente ti kliyente na.
Nagserbi ni Glas kas bise presidente iti Ecuador iti nagbaetan ti 2013 ken 2017 ngem nareliboan kadagiti duty na gapu iti alegasyon kenkuana a panagkunniber.
Iti isu metlaeng a tawen ket nasentesnyaan ni Glas a mabalud iti innem a tawen mainaig iti alegasyon kenkuana a panagkunniber iti Brazilian construction giant Odebrecht no sadinno nga inrakurak dagiti prosecutors nga immawat ti dati a bise presidente ti $13.5m a pasuksuk.
Nawaya-wayaan ni Glas manipod iti pagbaludan idi Nobyembre ngem nangiparuk-manen dagiti otoridad iti Ecuador ti sabali a arrest warrant mainaig iti isu metlaeng a kaso isut gapuna a napan nagkamang iti Mexican embassy.
