LAOAG CITY – Pormalen a nagbalin a miembro iti national swimming team ni dati a World Junior Championships campaigner Micaela Jasmine Mojdeh a napanen iti seniors division kalpasan ti naimballigian a career-na iti juniors class.
Karamanen ni Mojdeh iti listaan kadagiti national athletes a makaaw-awaten ti monthly allowance manipud iti Philippine Sports Commission.
Gapu iti daytoy, saan a mailinged ni Mojdeh ti kinaragsakna gapu ta maysa daytoy ket natungpal nga arapaapna ti pannakairaman kas maysa kadagiti opisial a miembro ti national pool.
Inkari ni Mojdeh nga aramidenna ti amin a kabaelanna tapno agtultuloy a maipaayanna ti pammadayaw ti pagilian kadagiti nagduduma nga international tournaments a pakipasetanna.
Nagyaman daytoy iti Philippine Aquatics Inc. ken Philippine Sports Commission iti suporta nga ipapaayda tapno ad-adda pay a dumur-as ti swimming ditoy pagilian.
