LAOAG CITY – Inpakaammo ni Retired 2nd Lieutenant Carmeloto Valdez Gudoy, miembro ti Veterans Association a kanayon a makipagpaspaset iti birth anniversary ni dati a Gov. Roque B. Ablan Sr.
Inbatadna a tinawen a makipagpaspaset isuna iti nasao a programa tunggal madanon ti Agosto 9 tapno ipakita ti panangrespetarda iti maibilang a maysa kadagiti bannuar ditoy pagilian.
Inlawlawagna a kas maysa nga Ilokano ket nakapatpateg nga iselebarar dagitoy nga okasion gapu ta daytoy ti mangipasimudaag iti pammigbig dagiti naaramidan ni dati a Gov. Ablan Sr.
Kunana a daytoy a simple a programa ket maibilang a naisangsangayan nga aldaw para kadagiti Pilipino kangrunaan kadagiti padana nga Ilokano kas panangsaludarda iti sakripisio ken kontribusion ni dati a Gov. Ablan Sr. tapno laeng mailaban ti pagilian a Pilipinas.
Innayonna nga uray bukud a biag ni dati a Gov. Ablan Sr. ket insakripisiona tapno naan-anay a magun-od ti panagwaywayas ti pagilian.
Kabayatanna, inparipiripna kadagiti agtutubo a kasapulan a maimula iti panunotda ti kinapateg dagiti inaramid a sakripisio dagiti bannuar ditoy pagilian tapno saan a malipatan dagiti sumaruno pay nga henerasion.
Immuna iti daytoy, balligi a naiyuswat ti maika-119 a tawen a panagkasangay ni dati a Gov. Roque B. Ablan Sr. iti Barangay 20 ditoy siudad ti Laoag nga addaan ti tema a “Panagkaykaysa para iti namnama: Strengthening Communities, Empowering Women and Sustaining the Land – Honoring the Legacy of Roque B. Ablan Sr.”
