LAOAG CITY – Inadmitir ni Mr. Lauren Eman Bayangos, iti Metro Ilocos Norte Council wenno MINC a saan pay a narugian ti pannakaibunong ti gas coupon nga agbalor ti 1,500 a pisos para kadagiti Jeepney Drivers kadagiti nagduduma nga asosasyon ditoy probinsia.
Segun kenkuana, daytoy ket kalpasan a palpasenda nga ummuna ti pannakaiyawat ti gas coupon nga agbalor ti 1,000 a pisos para kadagiti Tricycle Drivers manipod kadagiti nagduduma nga ili ken siudad ditoy probinsia.
Inbatadna nga iti agdama ket manarimaan pay laeng ti pannakaiproseso dagiti amin a dokumento dagiti nagaplikar a drivers rason nga adda ti panagginad ti pannakaibunong dagiti gas coupon kadagiti maseknan.
Gapu iti daytoy, dimmawat ti naan-anay a pasensiya ken pannakaawat dagiti Jeepney Drivers gapu ta ar-aramidenda met amin ti kabaelanda tapno maiteden ti gas coupon.
Inpakaammona a nailawlawag met daytoy a banag kadagiti Jeepney Drivers bayat iti panagbisitada kadagiti maseknan ken no adda ti maawatda a tawag pakaseknan iti nasao a banag.
Innayon na nga awan met pay ti target no kaano maiyawat ti gas coupon kadagiti jeepney drivers ngem inpasigurado na nga iti kabiitan a panawen ket dagitoy ti maisublat a maipaayan iti daytoy.
Ummuna iti daytoy, adda ti naawat ti Bombo Radyo a concerns manipud dagiti jeepney drivers nga agpapan ita ket saan da pay a naawat ti gas coupon nga agbalor ti 1,500 a pisos.
