LAOAG CITY – Nasapgud ti mini van ti maysa a babai iti Rizal Street ditoy siudad ti Laoag.
Ti biktima ket residente iti Barangay Caaoacan ditoy siudad ti Laoag idinto a ti nangiturong ti mini van ket agtawen ti 36, mekaniko ken residente ti Barangay Pila ditoy siudad.
Basar iti inisyal nga imbestigasion, aggapu iti Nolasco Street ti nasao a lugan nga agturong koma iti maysa nga autoshop idi napasamak ti desgrasia.
Mainaig iti daytoy, rumrummuar a posible a saan a naripar ti driver ti mini van ti biktima idi dumalyasat iti pedestrian lane.
Inlawlawag ti maseknan a driver a saan a napalidlidan ti biktima no diket napaidda laeng.
Naammoan nga awan ti sugat ti biktima ngem ang-angalenna laeng ti akinkannigid a sakana isu’t gapuna a naitaray iti kaasitgan nga ospital para iti naan-anay a pannakatamingna.
Agtultuloy ti imbestigasion ti Philippine National Police – Laoag Traffic Division mainaig iti napasamak.
