LAOAG CITY – Saan nga agpirma dagiti senador ti minorya a miembro ti Senate Blue Ribbon Committee (BRC) iti partial committee report ti naimbestigaran a maanomalya a flood control projects.
Daytoy ket iti baet a binaliwanen ti lengguahe nga inusar iti partial committee report ken saanen a “to be charged” ti sarita nga inusar para kadagiti senador a mairamraman iti isyu.
Inbatad ni Senador Robinhood Padilla a saanda nga agpirma iti Blue Ribbon Committee committee report gapu ta addaanda met ti “minority report” iti nasao a panagdengngeg ti flood control anomalies ken ditoy nga agpirmada.
Inlawlawagna a masapul a solid dagitoy iti minority ken no aniaman ti ibilin ti minority floor leader-da a ni Senador Alan Peter Cayetano ket isu ti surutenda.
Maipalagip nga immunan a nangiruar ti minorya iti panangidaulo da Senador Rodante Marcoleta ken Senador Imee Marcos ti “minority report” dagitoy para iti flood control anomaly investigation nga inawagan met ni Senate President Tito Sotto III a maysa laeng a PR wenno media report gapu ta awan met pay ti report manipud iti Blue Ribbon Committee.
