LAOAG CITY – Manamnama ti panangpaiget ti Metro Manila Development Authority wenno MMDA ti trapiko ken dagiti aktibidad kas paset ti panagsagsagana iti panangidaulo ti Pilipinas iti maika-49 nga Association of Southeast Asian Nations weno ASEAN Summit.
Manipud Oktubre 24 agingga Nobiembre 20, temporario a masuspenso ti panangisyu ti ahensia ti pammalubos para kadagiti fun-run, motorcade, prusision ken dadduma pay nga aktibidad iti Manila, Pasay, Parañaque, Makati ken Taguig.
Gagem daytoy nga addang a maliklikan ken makontrol ti trapiko kabayatan a maisagsagana dagiti lugar ken kalsada a mausar para iti regional summit.
Malaksid iti daytoy, manipud Oktubre 24, manamnama pay ti pannakaipaiget iti Philippine International Convention Center ken iti Cultural Center of the Philippines Complex, no sadinno a manamnama ti pannakaipatungpal ti full lockdown intono Nobiembre 7.
Maipatungpal pay ti moratorium kadagiti road works iti Metro Manila manipud alas-12 ti parbangon ti Nobiembre 1 agingga iti alas-12 ti parbangon ti Disiembre 23.
Kabayatanna, manamnama ti panagsangpet ditoy pagilian dagiti delegado para iti ASEAN Summit iti umuna a domingo ti Nobiembre.
