LAOAG CITY – Inlawlawag ni Mayor Michael Marcos-Keon ditoy ciudad ti Laoag no apay a saan a nakaatendar iti Proclamation rally ti kasinsin na a ni dati a senador Bongbong Marcos idiay Bulacan iti baet a naimbitaran daytoy ken ado dagiti opisyal ditoy probinsya a napan nagatendar.
Segun ken ni Mayor Keon, naladaw a naited ti imbitasyon kenkuana ken ado dagiti problema a sangsangwen iti agdama ditoy ciudad ti Laoag isut gapuna a saan a nakapan iti proclamation rally ni Marcos a para presidente ken ti katandem na a ni Davao Mayor Sara Duterte-Carpio nga agpaidasig a para bise presidente.
Inbatad na nga uray saan a napan nakaatendar iti nasao nga aktibidad ket mangnamnama iti agtultuloy a panagkaykaysa dagiti Pilipino a mangsuportar iti sibubukel a grupo ti kasinsin na.
Innayon na nga umun-una latta ni Marcos kadagiti maiyus-uswat a survey ken mangnamnama nga agtultuloy daytoy agingga a malpas ti eleksyon.
Kabayatanna, naamoan nga uray dagiti dadduma nga opisyal ditoy probinsya ket naladaw a naawat da ti imbitasyon.
