LAOAG CITY – Kalikagum ti Mariano Marcos Memorial Hospital and Medical Center iti siudad ti Batac a dumalan iti panagsanay dagiti sumagmamano a medical health care workers iti ballasiw-taaw.
Babaen iti daytoy, maikkan ti oportunidad dagiti hospital staff a makipaset iti panagsanay tapno ad-adda a maasa iti kabaelanda iti panangtaming kadagiti pasiente.
Segun ken ni Dr. Maria Lourdes Otayza, Medical Chief ti Mariano Marcos Memorial Hospital and Medical Center iti siudad ti Batac a ti pagsayataan ti panagsanay iti abroad dagiti hospital staff ket maysa nga investment iti naggapoanda no sadinno napinpintas ti pannakaipadanon ti serbisio medikal para kadagiti umili.
Inbatadna nga iti kinasirib dagiti medical practitioners ti Singapore General Hospital iti benneg ti salun-at ket adu dagiti mabalin nga iyaplikar ditoy probinsia.
Mainaig iti daytoy, maragsakan ni Dr. Otayza iti panagsubli dagiti medical practitioners manipud iti Singapore General Hospital nga ibilangna a nasingedna a pagayam.
Kabayatanna, inpanamnamana iti agtultuloy a panagkikinnammayetda iti pannakaisayangkat ti medical mission ditoy probinsia a saan laeng nga iti benneg iti orthopedic surgery no di ket dadduma pay a medical treatment.
