LAOAG CITY – Nangiparuk-at ti Mariano Marcos Memorial Hospital and Medical Center iti ciudad ti Batac ti Public Advisory babaen iti DOH Advisory pakaseknan iti saan nga otorisado a panaglako ti COVID-19 vaccines.
Daytoy ti kinumpirmaran ni Mr. Jhey-ar Mangati, ti Health Education ken Promotions Officer iti nasao nga ospital.
Gapu iti daytoy, nagballaag ti nasao nga ospital kadagiti organisasion wenno indibidual nga aglaklako wenno mangididiaya iti aniaman a klase ti COVID-19 vaccines.
Inpasagepsep ti DOH, FDA ken NTF a ti EUA dagiti amin a klase ti bakuna kontra iti COVID-19 ket marketing authorization wenno Certificate of Product Registration no sadino ket saan a mabalin nga ilako daytoy iti publiko.
Inlawlawag ti ospital a basar iti Department of Health nga amin nga saan a nakarehistro a klase ti health products ket naiget a maipawil ken mapatawan ti maiyannatop a pannusa babaen iti Food and Drug Administration Act of 2009.
Nailanad pay ditoy a no siasinoman ti mapaneknekan nga adda ti partisipasion iti maipawil a linteg ket sumango ti pannakaibalod ti maysa agingga 10 a tawen wenno agmulta ti saan a nababbaba ngem 50,000 pesos ngem saan a nasursurok ngem 500,000 pesos.
Mainaig iti daytoy, no ti nagsalungasing ket maysa a manufacturer, importer wenno distributor ti health product ket sumango ti saan a nababbaba ngem lima a tawen agingga sangapulo a tawen a pannakaibalod.
Malaksid iti daytoy, mabalin pay nga agmulta ti naglabsing ti saan a nababbaba ngem 500,000 pesos ngem saan a nasursurok ngem 5,000,000 pesos.
Mainaig iti daytoy, adda pay ti nayun a multa a maysa a porsiento iti economic value wenno cost iti nasao a produkto a sangaribu a pisos no daytoy ket agtultuloy nga ar-aramiden ti maseknan.
Kabayatanna, no makita nga adda ti panagsalungasing iti linteg ket makumpiskar ti produkto babaen iti FDA nga awan ti maiyuswat a hearing wenno court order.
