LAOAG CITY – Nakita dagiti scientists babaen ti maysa a drone dagiti aglalangoy a grupo ti dolphin iti paset ti Indian Ocean no sadinno ket ti maysa a dolphin ket kinargana ti natay nga anakna.
Basar kadagiti scientists a nakakita, naamoan a 2 weeks old pay lang ti nasao a natay a dolphin.
Maysa ni Fraggle kadagiti sumagmamano a dolphin a banbantayan ti Geographer Marine Research, maysa nga Australian conservation organisation.
Segun kadakuada, inyanak ni Fraggle ti anakna bayat ti winter season idiay Australia.
Segun iti panagsukisok, masansan a ti panaganak kuma dagiti dolphin ket iti summer season.
Nupay kasta, mabalin latta dagitoy nga aganak bayat ti panaglalamiis ngem segun kadagiti nasao a scientist, dagiti baby dolphin a maiyananak iti panaglalamiis ket maaddaan dagitoy ti naingpis a layer ti blubber wenno ti layer ti taba iti uneg ti kudilda ket no panaglalamiis ket saan a kabaelan dagiti mommy dolphin nga agbirok ti ipakanda iti annakda a rason ti pannakatay dagiti kaadoan a babassit a dolphin iti panaglalamiis.
Ti ipapatay ti anak ni Fraggle ket sinabayan dagiti daduma pay a dolphin a naglangoy isuna bayat a kargana ti natay nga anakna nga arigna agkakaduada nga agladladingit.
Kabayatanna, inbatad dagiti eksperto a masansan a karkargaen dagiti mommy dolphins dagiti natay nga anakda it uneg ti 2 agingga 7 nga aldaw, ngem ni Fraggle ket 11 nga aldaw a kinarkargana ti anakna sakbayna daytoy nga inibbatan.
