Inbatad ni Bombo International News Correspondent Rusty Abner iti Saudi Arabia, a makarikriknada iti buteng ken danag gapu ta saanda ammo no kaano a mapasamak manen iti insidente ti rinnupak iti nadakamat a pagilian.
Malaksid iti daytoy, napawilanda pay nga agipadamag iti mapaspasamak iti lugar ken rumbeng nga agtalinaed a kalmado ken sumurot iti pagannurotan.
Nupay kasta, inpasiguradona nga agingga ita ket napintas met ti kasasaadda gapu ta agtultuloy ti panagbantay ti gobierno ti Saudi Arabia tapno maprotehiran ti sakupenna ken dagiti residente.
Inpakaammona a kalpasan ti napasamak a panagraot iti erupuerto iti pagilian ket agtultuloy latta ti panagserrek dagiti empleado ken awan ti nasuspenso a trabaho, adda laeng dagiti sumagmamano a pagadalan ti nasuspenso ti klasena tapno maliklikan iti nairot a trapiko no adda man ti mapasamak manen a riribok.
Segun kenkuana, adda problema iti Saudi Arabia ken Yemen a saan pay a nalpas, isut gapuna a mangnamnama a masolbar koma daytoyen iti nainkapiyaan a wagas.
Kabayatanna, makitartaripnong ti Saudi Arabia kadagiti nagduduma a pagilian kas ti Pakistan, Estados Unidos ken dadduma pay a kabangibang a pagilian tapno malapdan ken masolbar ti riribok iti nainkapiyaan a wagas kas diplomasia gapu ta kalikagum ti Saudi a maprotehiran ti teritoryo na.
