LAOAG CITY – Naisayangkat ti Motorcade Protest ita nga aldaw iti sangoanan mismo ti Motor Vehicle Inspection Center ditoy ciudad ti Laoag.
Sangkamaysa a nagkakadua dagiti motorsiklo ken car vehicle drivers iti nasao a tignay protesta kageddan ti napipigsa a panagbusina da gapo ta gagem da a maipadanon ken mangngegan dagiti timpuar nga arungaing dagiti drivers sipod nangrugi ti operasion ti Motor Vehicle Inspection Center ditoy Siudad.
Makita kadagiti lugan nga adda ti karatulada a naipegket kadagiti sango ti lugan da a “NO TO PMVIC.”
Naammoan nga umabot ti nasurok sangapulo manipod iti nagduduma a rider’s organization pakairamanan ti N-Max Elite, Mio Owners Republic, Honda Click Ilocos ken dadduma pay ti nakipagpaset iti Motorcade Protest.
Babaen iti daytoy a wagas ket maipadanon da ti karirikna da nga adu dagiti motorista ti marigatan iti agdama a maiyim-implementar a pagannurutan ti Motor Vehicle Inspection Center.
Immun-una ngem iti daytoy, ginutigot dagiti kameng ti Sangguniang Panlalawigan ti Land Transportation Office nga ikonsiderarda ti pannakaiyimplementar ti Motor Vehicle Inspection Center a nayon a padagsen kadagiti kailian nangruna kadagiti napukawan ti pagsapulan gubuay iti pangta ti COVID-19 pandemic.
Maipalagip a mannarimaan ti panagadal ti Sangguniang Panlalawigan ti Draft Resolution tapno adalenda ti mabalin a pannakasuspenso ti Motor Vehicle Inspection Center ditoy Siudad ti Laoag.
Kabayatanna, nangipatulod ti surat ni Mr. Richard Chua iti opisina ni Mayor Michael Marcos Keon ket ditoy met a naaprobaran ti Motorcade Protest.
Mainaig iti daytoy, segun ken ni Police Lieutenant Colonel Rafael Lero ti Chief of Police ti PNP Laoag a nangtedda met ti security assistance kadagiti nakipagpaset iti tignay-protesta.
Innayonna a motorcade protest laeng ti naisayangkat gapu ta saan a mabalin nga adda ti panaguummong iti maysa a lugar.
