LAOAG CITY – Naglikudan ni Mr. Edwin Quiroga, Administrative Officer ti Department of Public Safety (DPS) ditoy ciudad ti Laoag ti alegasyon kenkuana a dinanog ken pinangtaan na ni Barangay Kagawad Henry Ancheta itiBarangay 59-B, Dibua North ditoy ciudad ti Laoag.
Segun kenni Quiroga, saan na nga ugali ti agipangta ken awan ti kabaelan na nga agpapatay.
Inlawlawag na nga idi Mayo 10, bayat nga agselselebrar da ti Mother’s Day ket limmabas ni Ancheta ken ti kedendenna na isut gapo na nga inawis isuda ti uliteg ni Quiroga ngem maipagarop a ti sungbat ti kadwa ti kagawad ket saan da a kayat gapo ta adda ti nabangsit ti ngiwat na kadakuada.
Kunana a nagsao ni Julie Anne Quiroga ket ditoy nga inbatad manen ti kadwa ni Ancheta a daytoy ti nabangsit rason a nagtaray ni Edwin Quiroga tapno damagen no apay a naibaga na daytoy.
Nupay kasta, inbatad ni Edwin nga idi nakadanon iti ayan da Ancheta ket maipagarop a nakugtaran rason met a rimwar ti asawa na ken ditoy met a pinungot-pungot da daytoy.
Inpetteng ni Quiroga nga imbes nga aganawa ti kagawad nga Ancheta ket maipagarop a nakipinnungot pay a ti patyen na a rason ket ti panangkritkritikar ti asawa na iti opisyal gapo iti nabangsit a pagtaraknan na ti aso.
Innayon ni Quiroga nga idi nalpas ti komosyon ket nagawid da ngem maipagarop a nagpukkaw ni Ancheta ti duling.
Naamoan a nabayagen nga adda ti susik dagiti dua a pamilya.
