Isagsagana ni Mrs. Evalaudia Duyor ti Provincial Assessors Office iti pannakaipaima iti sabali a mangidaulo kalpasan ti panagretirona.
Segun kenkuana, maysa kadagiti kangrunaan nga ar-aramidenna iti agdama ket ti panangilawlawagna kadagiti agbalin a trabaho ti Provincial Assessor.
Inbatadna a maysa kadagiti bilinna iti siasinno man a madutukan a mangidaulo iti nadakamat a pagopisinaan ti panagsungbatda kadagiti group chat iti babaen ti WhatsApp, Viber ken nagduduma pay.
Kinunana nga inpagunamgunamna a no saan a kasapulan ti kapanpanunutanda ket nasaysayaat no agulimek dagitoy.
Malaksid iti daytoy, inpaganetgetna a kadagiti kritikal a banbanag ket masapul a saanda nga itulok a ma-pressure dagitoy.
Kabayatanna, impatalgedna a kadagiti programa ti opisinada ket siniguradona met a naurnos amin dagitoy tapno awan ti aniaman a pagproblemaan ti sumaruno a madutokan a mangidaulo iti nadakamat a pangopisinaan.
Inlawlawagna nga iti panagisaganada iti Schedule of Market Value wenno SMV ket nakasaganan ti opisinada.
Iti baet daytoy, kinunana a gapu ta saan met pay a naikkat ti state of emergency ni Presidente Ferdinand R. Marcos Jr. iti pannakaipatungpal dagiti programa a masapul nga atendaran dagiti naruay a kakailian kas iti konsultasion ken taripnong ket saan pay laeng a naituloy.
Innayonna a naisubmitirda pay ketdin daytoy ken kasapulan laengen ti naan-anay a pannakaplantsana agsipud ta adda dagiti innayonda a lungalong ken kapanpanunutan dagiti stakeholders a mainayon iti inaramidda nga SMV.
Maipalagip a ni Duyor ket 25 a tawenen a nagserbi iti Gobierno probinsial ken pormal a nadutukan daytoy a kas Provincial Assesor idi 2025.
