LAOAG CITY – Manamnama a maitabon intono umay a lawas ti bangkay ni Mrs. Fortuna Marcos-Barba, ti inaudi a kabsat ni dati a Presidente Ferdinand Marcos ken ina ni Vice Governor Angelo Marcos Barba.
Nupay kasta, kuna ni Sang Panlalawigan Member Mariano Nonong Marcos nga awan pay ti sigurado nga aldaw a pannakaitabon ni Mrs. Barba.
Immunan a kinumpirmaran ti bokal a napan kinita amin dagiti kameng ti pamilya Marcos ti bangkay ni Mrs. Barba idi adda pay laeng idiay Metro Manila.
Innayon ni Bokal Marcos nga ado ti papagayam ni Mrs. Barba ditoy probinsya kangrunaan na iti ili ti San Nicolas a mayat a mapan mangkita ti maseknan.
Mainaig ti daytoy, bayat ti sesyon idi kalman ket kiniddaw ni Bokal Vicentito Lazo ti panagulimek da amin nga adda iti session hall iti sumagmamano a minutos tapno ikararagan da ti pimmusay nga ina ti bise gobernador.
Maipalagip a natay ni Mrs. Barba iti tawen na nga 87 gapu ti sakit na a pneumonia idi Marso 3 ita a tawen.
