LAOAG CITY – Kinumpirmaran ni Sangguniang Bayan Secretary Jayson Antonio iti ili ti Piddig a temporario pay laeng a naipaserra ti Mount Lammin tapno maliklikan ti grass fire.
Segun kenkuana, saan daytoy a naipadalan iti Sangguniang Bayan gapu ta ti Executive Branch ti nangiyetnag ti desision maipanggep iti nasao a banag.
Mainaig iti daytoy, basar iti online post ti Local Chief Executive a ti temporary closure ket maysa a “preventive measure” kontra iti posible a grassfire a mabalin mangitunda ti pannakadadael iti nadakamat a bantay.
Daytoy ket kalpasan a maysa iti ili ti Piddig ti nakairekord ti insidente ti grass fire kadagiti naglabas a tawen isu a nagbalin nga alertoda iti agdama tapno maipasigurado nga adda ti nasayaat a kasasaad ti wildlife ken komunidad iti aglawlaw ti bantay.
Naammoan a nangrugi nga inarak dagiti turista ti Mt. Lammin sipod idi naikkan ti konkreto a kalsada nga agturong iti pilot national convergence program para iti coffee plantation.
Inadmitir met ti Bureau of Fire Protection (BFP) a saan a well-equipped ti ahensia tapno masebseban ti forest fires.
Maipalagip nga iti napalabas a tawen, nangiyestablisar ti lokal a gobierno iti ili ti Piddig dagiti checkpoint nga agturong iti bantay.
Kabayatanna, dagiti checkpoint ket masarakan iti Barangay 22, Boyboy Junction ational road iti Piddig-Carasi-Solsona highway ken Barangay 18 Estancia iti boundary ti Sitio Utoy ken Guisit iti Barangay Maruaya-Calambeg.
