LAOAG CITY – Napili ti multi-awarded a kumakanta manipud Bicol, a ni Blessie Mae Abagat, a mangkanta iti Lupang Hinirang iti maikatlo nga State of the Nation Address wenno SONA ni Presidente Ferdinand Bongbong Marcos Jr.
Nabigbig ni Abagat kas 2024 division champion ti vocal pop category iti kaliplippas laeng a 27th World Championships of Performing Arts idiay Long Beach California, USA a tinabunuan ti nasurok a 3,000 a delegado manipud iti 62 a pagilian.
Malaksid iti daytoy, nangabak pay ni Abagat iti balitok a medalya para iti kategoria ti vocal gospel, vocal contemporary, vocal pop ken vocal world.
Mainaig iti daytoy, impanamnama ni House Secretary General Reginald Velasco a 100 porsiento a nakasagana ti Kamara para iti State of the Nation Address a maangay inton Hulio 22 iti Batasang Pambansa.
Maipalagip nga idi laeng kalman ket naangay ti naudi nga inter-agency coordination meeting para iti preparasyon ti State of the Nation Address a sinaruno ti walk through para iti pagnaan ni Presidente Ferdinand Bongbong Marcos bayat ti isasangpetnan tu iti Batasan Pambansa aginnga nga aggngudo ti programa.
