LAOAG CITY – Naunday a panawen a nagserbi iti gobierno ni Mr. Rummel Madamba, ti agdama a Municipal Administrator iti lokal a gobierno iti ili ti San Nicolas.
Segun kenkuana, 1984 idi umuna a tawen a nagtrabaho isuna iti lokal a gobierno agingga a nagserbi pay isuna kadagiti dadduma pay nga ili.
Inbatadna a saan a nalaka ti sinerrekna a trabahona gapu ta managbabain daytoy ngem agingga a nasursurona ti pannakilangen-langen kadagiti tattao.
Gapu iti daytoy, kunana nga in-inot a naasa ti abilidadna nangruna ket trabahona a mangakomodar ken tulungan dagiti agkasapulan ti tulong kadakuada.
Inlawlawagna a masapol nga agbalin a nagaget ken nasingpet iti panagserbi iti publiko gapu ta daytoy ti saanto pulos a malipatan dagiti tattao.
