LAOAG CITY – Naalarma dagiti residente iti Barangay Isic-Isic iti ili ti Vintar kalpasan nga adda ti maysa a lalaki a baro a rupa iti lugar nga agwarang-warang ken mapmapan iti pagadalan.
Daytoy ti inpakaammo ni Barangay Chairman Rolly Nacuray iti nadakamat a barangay.
Inbatad ti kapitan nga apaman a naipakaammo kenkuana ti panagwarang-warang ti saan pay a nabigbig a lalaki iti barangay da ken mapmapan iti pagadalan ket inbilin na a dagus ti panangtiliw dagiti pada na nga opisyal iti daytoy.
Kuna na nga idi damo a gandaten da a tiliwen daytoy ket napaay da gapu ta nakataray iti kabanbantayan.
Nupay kasta, kuna ni kapitan Nacuray nga iti simmaruno a gundaway ket nagballigi da met laeng a nangtiliw ken iti panangdamdamag na iti kinatao ti maseknan ket awan ti naala na nga impormasyon malaksid iti inbaga na a taga Bicutan daytoy.
Innayon na a kayat da pay a pagdigusen gapu ta addan ti sabali nga angot na ngem nagkedked ti maseknan.
Iti agdama, inpakaammo ti kapitan a ti lalaki a mapatta-patta nga agtawen ti 50 agpangato ket nagtalinaed iti Barangay Hall da ken iyur-uray da dagiti pannakabagi ti Department of Social Welfare and Development (DSWD) tapno isuda ti mapan mangala iti maseknan.
