LAOAG CITY – Umabot iti 78 nga estudyante iti sekondarya ken elementarya ditoy ciudad ti Laoag ti nakaawaten ti stipend na.
Daytoy ti inpakaammo ni Ms. Perlita Cabello, ti mangidadaulo ti City Social Welfare and Development Office ditoy ciudad.
Segun kenkuana, dagiti nakaawat ti stipend ket dagiti estudyante a napabilang iti Learners At Risk of Dropping Out ken Student Assistance for Education Resilience for Learners At Risk of Dropping Out a programa ditoy ciudad.
Inpakaammo na a kadagupan dagiti 78 nga estudyante ket 45 ditoy ti sekondarya idinto a 33 met iti elementary pupils.
Mainaig iti daytoy, kunana a ti pannakaibunong ti allowance dagiti nasao nga estudyante ket nagbinnuligan ti opisina da ken ti Schools Division of Laoag.
Kabayatanna, mangnamnama ni Cabello a babaen ti nasao a tulong pinansial ket ad-adda pay nga igaed dagiti estudiante ti panagadal da agingga a makaturpos ken magun-od da dagiti arapaap da iti biag.
