LAOAG CITY – Kabayatan ti panagtitipon ti College of Cardinals idiay Vatican para iti naisangsangayan a conclave ita a 2025, saan laeng no asino ti maelektaran kas baro a Santo Papa ti mapagsasaritaan no diket karaman payen no ania a nagan ti pilienna.
Basar iti Vatican, ti panagpili ti nagan ti umuna nga opisial nga ar-aramiden ti baro a naelektaran a Papa kalpasan nga inawatna ti responsibilidad kas kangatoan a Pontiff no sadinno ket pormal nga irakrakurak iti babaen ti panangirakurak iti Latin nga ”Habemus Papam” wenno Addan ti Papatayon).
Ti tradision ti panagsukat ti nagan ti Pope ket adda ti pakainaiganna iti nagkauna a Kristianismo a mangipasimudaag iti espiritual a panagbalbaliw kas ti napasamak ken ni San Pedro a dati a ni Simon. Iti panagtulid ti panawen, nagbalin a nakadawyan ti panagsukat ti nagan tapno iwarsi dagiti naggapoanan nga orihinal a nagan. Pormal daytoy a nagbalin a pangibasaran idi 955 AD iti babaen ni Pope John XII.
Iti pakasaritaan, 129 iti 266 a Pope ti nagsukat ti nagan kalpasan a naelektaran. Ti pilpilienda a nagan pangalan ket masansan nga adda ti nauneg a kayatna a saoen ken mensahe, mabalin iti panagtultuloy ti tradision, panangsaludar kadagiti immuna a Santo Papa wenno indikasion ti baro a direksion para iti Simbaan.
Naammoan a masansan a maus-usar iti pakasaritaan ti nagan a “John” a 23 a daras, sumaruno ti “Gregory” ken “Benedict” a sag-16 ken “Pius” ket 12.
Ni Pope Benedict XVI ket pinilina ti nagan a “Benedict” kas pananglagip ken ni Pope Benedict XV, maysa a mangidadaulo idi Word War I ken ni Saint Benedict ti Nursia a mangimatmaton ti Western monasticism.
Ti sumagmamano a nangaramid ti kombinasion kas kada Pope John Paul I ken John Paul II kas panangsaludar kada John XXIII ken Paul VI.
Kabayatanna, ni Pope Francis ti kaunaan a nagusar ti nagan a “Francis,” a maisupadi iti tradision kas simbolo ti nasingpet ken reporma nga insagutna ken ni San Francisco ti Assisi.
Iti baet daytoy, adda dagiti nagan ti padi a saan pay anaus-usar kas ti Joseph, James, Andrew ken Luke ken awan ti asinoman ti nangpili ti nagan a ”Peter II,” kas mangipasimudaag ti naiget a panangrespetar ken ni San Pedro a pammati ti Simbaan Katolika kas immuna a Pope ti Simbaan.
Iti agtultuloy a conclave, magagaran dagiti deboto iti intero a lubong a maammoan, saan laeng no asino ti sumaruno a lider ti Simbaan Katolika no diket no ania a nagan ti usarenna.
