LAOAG CITY – Kalikagum ti Sangguniang Panlungsod nga agkiddaw iti Ilocos Norte Water District ken iti Prime Water a maipalawa pay ti mabalin a sakupen ti pakadanonan ti panagsuplayda ti danum ditoy siudad ti Laoag.
Daytoy ti nagbalin a rakurak ni Konsehal Jason Perrera iti agtultuloy a problema daytoy iti adu a populasion ditoy siudad.
Inbatadna a karaman kadagiti awanan ti suplay ti danum nangruna ita a panawen ti kalgaw ket iti Barangay Lagui-Sail, Barangay Vira, Barangay Salet Bulangon ken Barangay Bacsil.
Inlawlawagna a ti danum ket napateg iti inaldaw-aldaw para iti maysa a tao gapu ta daytoy ti kangrunaan nga us-usarenda manipud iti panagluto, pagdigus, pagdalus, inumen ken dadduma pay.
Kunana nga adu dagiti tao a nakabael nga agbiag uray awanan ti ayat ngem awan ti mangkabael nga agbiag no awan ti danum.
Mainaig iti daytoy, kalikagumna a mapaayaban iti konseho ti Ilocos Norte Water District wenno Prime Water tapno ipakaammo ti kiddawda a maidanon koma ti serbisio kadagiti maseknan a barangay.
