LAOAG CITY – “Awan ti maibati a mangisursuro, maysa a gagem, edukasion para iti amin!”
Daytoy ti ikkis dagiti Pilipino a mangisursuro manipud kadagiti nagduduma nga organisasion a nagtitipon kageddan ti pannakaselebrar ti World Teachers’ Day.
Naisayangkat ti forum nga addaan ti tema a “Valuing Teacher Voices: Towards a new social contract for education” iti maikapat a kadsaaran ti National Press Club (NPC) of the Philippines nga inatendaran ti lokal ken nasyunal nga organisasion a bukbuklen dagiti Filipino teachers.
Karaman kadagiti nagatendar ket ti TEACHERS Inc., Action and Solidarity for the Empowerment of Teachers (ASSERT), ALS-Manila Teachers, Teachers Dignity Coalition, Gurong Nagbabalik sa Bayan ken E-Net Philippines no sadinno nga inpeksada ti arungaingda ken dagus a panangsolbar kadagiti karit a sangsangoen dagiti mangisursuro kas ti pannakaipatungpal ti MATATAG curriculum agingga iti agtultuloy nga isyu iti Magna Carta para kadagiti Public School Teachers.
Inpetteng ni Eselwisa Puri ti Action and Solidarity for the Empowerment of Teachers, dagiti benepisio a nasken a maawat dagiti Action and Solidarity for the Empowerment of Teachers ken dagiti pagannurutan a mangprotehir kadagiti karebbenganda kas maysa a mangisursuro kas ti working hours, health support, promotion ket nailanad iti iti Magna Carta.
Mainaig iti daytoy, nagpanawagan met ni Jonalyn Arao, President ti ALS-Manila Teachers nga iti Alternative Learning System (ALS) ket saan a nagbalin nga alternatibo dagiti mangisursuro gapu ta amin dagitoy ket agisursuro ti patas isu a dagiti benepisioda ket rumbeng a patas.
Malaksid iti daytoy, nangipeksa ti pannakadismaya da Caren Maca ken Roger Jugatan nga agpada nga Indigenous Peoples Education (IPEd) teachers ken miembro ti Lubos nga Alyansa ng mga Katutubong Ayta ng Zambales gapu ta imbes a ngumato ti budget para iti Indigenous Peoples Education ket nakissayan pay.
Kabayatanna, inbatad ni Carla Santos, Presidente ti E-Net Philippines, nalawag a dagiti arungaing ken panawagan dagiti Pilipino a mangisursuro mainaig iti sangsangoenda a problema iti baet ti ipapaayda a nangato a kalidad ti panangisuro kadagiti estudiante.
