LAOAG CITY – Inpasigurado ni Engr. Randy Nicolas iti Provincial Disaster Risk Reduction and Management Office a nakasagana ti Ilocos Norte iti posible nga epekto ti Super Typhoon Mawar apaman a sumrek iti pagilyan.
Segun kenni Nicolas, idi kalman ket nangiyuswat da ti Pre-Disaster Risk Assessment Meeting ken Preparedness Update dagiti nagduduma a lokal a gobierno, dagiti ahensya kas iti Dept. of Interior and Local Government, Philippine National Police ken iti Bureau of Fire Protection.
Malaksid iti daytoy, adda pay ti nakasagana a walo ribo a family food packs ken dagiiti non-food items para iti relief operation.
Karaman kadagiti addaan pay ti family food packs na ket iti ili ti Pagudpud nga umabot iti 500, adda met ti 400 iti Pasuquin, sag-200 iti Currimao, Banna ken Solsona ken 500 iti ciudad ti Batac ken dagiti kabangibang nga ili nga agkasapulan ket mabalin da a mangala kadagitoy.
Adda pay ti 100 packs ti bagas para iti relief operation nga adda iti National Food Authority malaksid laeng iti isagsagana a mismo ti ahensya.
Kunana a no bilang adda ti mapasamak a panagreggaay ti daga ket nakasaganan dagiti equipment a mausar no sadinno iti Provincial Engineering Office ket nangbukel ti nagduduma a grupo para iti road clearing, electrical safety ken dadduma pay.
Inbatad na pay nga uray dagiti evacuation center ket nakasagana metten no bilang kasapulan nga agbakwit dagiti residente.
Mainaig iti daytoy, kunana nga iti agdama ket naipan ti opisina da iti Blue Alert ken agtultuloy ti panagmonitor da.
Kabayatanna, binalakadan ni Nicolas ti publiko nga ammoen dagiti pre-emptive guidelines ken maiparit pay laeng ti mapan agkalap tapno mailiklik iti madi a mapasamak kageddan ti panawagan na kadagiti barangay officials a tumulong nga agmonitor kadagiti masakupan da.
