LAOAG CITY – Ngimmina dagiti sumagmamano a prutas a mailaklako iti Laoag City Public Market and Commercial Complex sumagmamano nga aldaw sakbay ti paskua.
Segun ken ni Mrs. Eufemia, maysa kadagiti aglaklako ti prutas, daytoy ket kalpasan nga adda ti panagkurang ti suplay a maipatpatulod kadakuada.
Inbatadna a ti dati ket magatangda ti maysa a karton ti apple ti 1,500 ngem itan ket dumanonen iti 2,050.
Gapu iti daytoy, inpalgakna nga awan ti maaramidanna no di ket ipangato met ti presio dagiti ilaklakoda a prutas.
Nupay kasta, inpettengna a bassit laeng ti inayonda iti presio tapno mailakoda met laeng dagiti ilaklakoda a prutas.
Inpasingkedna nga umanay ti prutas nga ilaklakoda agingga iti panangsarabo ti baro a tawen.
Innayonna nga adda ti 3 for 100 ti apple, orange ken dadduma pay tapno malakaan dagiti mapan gumatang kadakuada.
Kabayatanna, naammoan a dumanon iti 200 a pisos agingga 300 a pisos iti kada kilo ti grapes.
