LAOAG CITY- Kalikagum ni Governor Cecilia Marcos nga iyimplementar dagiti nagduduma a proyekto a dakkel a makatulong iti agbalin nga epekto ti umay a Super El Niño.
Daytoy ket gapu iti panagturongda kada Mr. Enzo Marcos ti chief of staff-na dagiti pannakabagi ti Provincial Agriculture Office (PAO) a nangbisita iti display area idiay Quezon City.
Naitampok kadakuada dagiti rain water catchment, fish container tank ken organic chair a mabalin a mausar kadagiti pagadalan.
Napalaos ti panangdayaw ti gobernadora ti napintas a pannakaaramid dagitoy kangrunaanna iti rain water catchment.
Mainaig iti daytoy, manamnama nga adaptaren ti Provincial Government of Ilocos Norte (PGIN) ti nasao a sistema.
Malaksid iti daytoy, ibilang ni Gobernor Marcos a dakkel a tulong iti probinsia kangrunaanna iti panangpaadu ti produksion iti lames wenno ikan ti pannakaiyestablisar dagiti fish container tank.
Imunnan ditoy ti panangipakaammo ni Dr. Jonar Yago, ti Agricultural Development Coordinator ti Provincial Agriculture Office ti panagkukuyogda kada Gobernador Marcos a mangbisita iti pagaramidan ti container a mabalin a pagtaraknan ti pasayan wenno udang ken tilapia.
Impasiguradona a dakkel daytoy a suporta iti kalikagum ti gobernador a mangiyestablisar iti sustainable aquaculture project ditoy probinsia.
