LAOAG CITY – Inpakaammo ni Mr. Xavier Ruiz, Officer-in-Charege iti Provincial Tourism Office a nakasaganan nga iwayat ti gobierno probinsial dagiti nagduduma nga aktibidad kas paset ti selebrasion ti Ferdinand Edralin Marcos Sr.
Inpettengna a kas iti gagangay nga araramidenda tunggal maiwayat ti Marcos Fiesta ket makibinnuligda iti Marcos Presidential Center.
Kinunana a maiwayat dagiti aktibidad manipud inton Septiembre 5 agingga iti Setiembre 30.
Segun ken ni Ruiz, pakairamanan dagiti programa ken aktibidad a mapasamak a kas iti tree planting, job fair, literary competition, launching ti Mariano Marcos State University paddy art, cooking competition, thanksgiving mass, wreath laying, free dialysis, I love Ilocos concert ken BBM camp.
Maipalagip nga immunan a nangipasa ti Sangguniang Panlalawigan ti maysa a resolusion tapnu ideklara a special non-working holiday inton Septiembre 11 ditoy probinsia kas pambigbig iti pimmusay a dati a Presidente Ferdinand Edralin Marcos Sr.
