LAOAG CITY – Dua laeng a mayor ditoy probinsya ti nakaatendar iti naisayangkat a misa ken ti wreath laying ceremony iti President Ferdinand E. Marcos Monument iti ciudad ti Batac iti pannakaselebrar ti maika-103 a panagkasangay ni dati a Presidente Ferdinand Marcos ita nga aldaw.
Dagitoy ket da laeng Mayor Windell Chua iti ciudad ti Batac ken ni Mayor Michael Marcos-Keon ditoy ciudad ti Laoag.
Ti nasao a seremonya ket indaulwan ti apoko daydi dati a presidente a ni Governor Matthew Marcos-Manotoc.
Karaman pay dagiti nagatendar da Vice Governor Cecilia Araneta-Marcos, Congressman Angelo Marcos-Barba ken dadduma pay nga opisyal ditoy probinsya.
Malaksid iti daytoy, adda pay dagiti nagduduma nga aktibidad ngem naisayangkat dagitoy babaen iti online gapu pay laeng iti mapaspasaran a covid-19 pandemic.
Karaman kadagiti naisayangkat nga aktibidad ket ti Kuwentong Quarantine, Spoken Word Poetry, Dinengdeng Cooking Vlog Contest, duet singing contest ken Ilocano digital poster making contest a nakasentro iti “COVID awareness”.
Kabayatanna, inpeksa ni Ilocos Norte 2nd District Rep. Angelo Marcos-Barba ti ragsak na gapu ta nadanun manen ti panagkasangay daydi dati a Presidente Ferdinand Marcos.
Ita nga aldaw ti maika-103 a panagkasangay ni dati a Presidente Marcos nga ibilang ti nasao a kongresista a kasiriban a presidente ditoy pagilyan.
Immunan a nagpila ni Barba ti gakat iti kongreso para iti pannakaideklara ti Setyembre 11 iti kada tawen kas Special Non-Working Holiday.
Inpanakkel ni Barba a naaprubaran iti kongreso ti inpila na a gakat iti maikatlo a pannakabasa na ken naitransmit daytoyen iti senado.
Innayon ni Barba a maawagan to daytoy ti President Ferdinand Edralin Marcos Day.
