LAOAG CITY – Inpakaammo ni Ms. Janet London, mangidadaulo ti Gender and Development Office a manamnama a maiwayat dagiti nagduduma nga aktibidad ken programa ti opisina da ita a bulan ti Nobiembre.
Segun kenkuana, daytoy ket paset pay laeng iti pannakaselebrar ti Population Development Week a maiwaywayat iti kada tawen, manipud Nobiembre 23 agingga iti Nobiembre 29.
Mainaig iti daytoy, kunana a ti selebrasyon iti a tawen ket addaan ti tema a “Tao ang Puso ng Pag-unlad”.
Kinunana a karaman kadagiti aktibidad a maiwayat ket ti Parent Teen Talk iti babaen ti pannakikoordinarda kadagiti nagduduma a lokal a gobierno ti probinsya kas iti ili ti Bangui, idinto nga iti ili ti Solsona ket maiwayat ti Clean and Green Activity, maisayangkat met ti Adolescent Health and Youth Development Symposium para kadagiti adda iti maika-innem a tukad iti ili ti Pinii ken manamnama a maangay ti KATROPA wenno Kalalakihang Tapat sa Responsibilidad at Obligasyon sa Pamilya nga atendaran dagiti kameng ti Bureau of Fire Protection ditoy probinsia, idinto nga iti ili ti Sarrat ket manamnama nga atendaran dagiti baragay officials ken Committee on Family Welfare.
Kabayatanna, kunana a gagem dagiti nasao nga aktibidad ken programa a makatulong iti panagdur-as ti komunidad ditoy probinsia ken mangiwanwan ti reproductive health, family planning ken responsible parenthood.
