LAOAG CITY – Naiyuswat ti motorcade babaen kadagiti kameng ti Bureau of Fire Protection (BFP) manipud iti nagduduma nga ili ditoy probinsya kas paset iti Fire Prevention Month ita a Marso.
Karaman kadagiti nakipartisipar a BFP Stations ket ti ciudad ti Laoag pakairamanan ti Provincial Headquarters, iti ili ti San Nicolas, Dingras, Solsona, Banna, Nueva Era ken dagiti dadduma ket adda ti bukod da a motorcade.
Ti nasao nga aktibidad ket addaan ti tema a “Sa Pag-iwas sa Sunog, Hindi ka Nag-iisa”.
Segun kenni Fire Supt. Floro Obrero, Provincial Fire Marshall ditoy Ilocos Norte, ti motorcade ket mangipasimudaag a nangrugin ti Fire Prevention Month ken adda pay dagiti nagduduma nga aktibidad.
Naisayangkat pay ti launching ti “Kaisa” a nakipagpasetan dagiti amin a pasdek negosyo tapno maadalan no kasano ti pannakaliklik ti uram.
Mainaig iti daytoy ket pinalagipan ni Obrero ti publiko nga agannad tapno awan ti mapasamak nga uram iti masangwanan.
