LAOAG CITY – Maisayangkat ti nagduduma nga aktibidad ti Bureau of Fire Protection kagiddan iti pannakaobserbar ti Fire Prevention Month ita a bulan ti Marso.
Segun ken ni F/Supt. Roxanne Parado, Provincial Fire Marshal ti Bureau of Fire Protection, ita a tawen ket saan nga agbalin a centralized ti pannakaiyuswat kadagiti aktibidad ken programa no sadinno a magutigot amin dagiti Local Government Units iti intero a probinsia a makipaset kadagitoy.
Inbatadna nga adda dagiti fire truck a mapan agsursor kadagiti nagduduma a barangay kadagiti nagduduma nga ili ken siudad ditoy probinsia tapno mapalagipan dagiti residente ti rumbeng nga aramiden tapno maliklikan ti uram.
Kunana nga adda ti maisayangkat a fire safety awareness program kadagiti nagduduma a Local Government Units.
Malaksid iti daytoy, inpakaammo ni F/Supt. Parado nga adda pay ti maiwayat a fun run inton Marso 21 ken poster making contest para kadagiti estudiante.
Inlawlawagna a ti bulan ti Marso ti pannakaobserbar ti Fire Prevention Month ditoy Pilipinas gapu ta daytoy ket basar iti nailanad idi Nobiembre 17, 1996 nga opisial nga inproklamar ni dati a Presidente Ferdinand Marcos Sr. babaen iti panangpirmana ti Proclamation No. 115-A.
Innayonna a maisayangkat ti Marso gapu ta ita a bulan ti pakairekrekordan ti nangato a bilang dagiti mapaspasamak nga uram.
Kabayatanna, naammoan a ti tema ita a tawen para iti Fire Prevention Month ket “Hangad Nating Lahat Pamayanang Handa, Aktibo at Masagana.”
