LAOAG CITY – Inlawlawag ni Brgy. Kagawad Anabelle Pascua, iti Brgy. 19 iti ili ti San Nicolas ti napasamak sakbay a naamoan amin nga inaramid a panagtatakaw ti maysa a menor de edad a nagtakaw kadagiti baka.
Segun kenkuana, nagsublisubli a nagkamang kenkuana dagiti napukawan ti dua a baka a kabarangayanna tapno agpatulong a mabirokan dagiti dingwen.
Gapu iti daytoy, inbatad na a tinawagan na ti maysa nga agnagan ti Oscar nga aggatgatang iti baka ken dinamag na nu adda ti nagilaklako kenkuana.
Kuna na a kinumpirmaran ni Oscar nga adda aglaklako kenkuana ken daytoy ket naikamang iti likod ti Nissan ken taga Brgy. Nalbo ditoy siudad.
Gapu iti daytoy, inbaga ni Pascua nga isu ti nagbalin a lead da iti pannakabirok dagiti mapukpukaw a baka.
Inlawlawag na a kalpasan ti naamoanna ket nagturong a dagos iti lugar babaen metlaeng iti pannakikoordinar na kenni Oscar.
Kabayatanna, saan da a nadanun ti suspek ken kabayatan ti panagbirok da ket naamoan da a napan inpasirig ti suspek dagiti baka iti Brgy. 22- Catuguing.
Gapu iti daytoy, kuna ni Kag. Pascua a nagturong da iti nasao a barangay ken babaen iti pannakikoordinar da kadagiti opisyales ket natunton da ti lakay nga agnagan ti Valentin immuna a nangipadasan ti suspek a naglakoan kadagiti dingwen.
Kabayatanna, inbatad ni Pascua a kabayatan ti pannakisarsarita da iti lakay ket adda ti nangipakaamo kenkuana nga addan ti suspek iti Brgy. 19.
Gapu iti daytoy, intugot da ti lakay ken dita a kinumpirmaran na a ti menor de edad ti suspek ken ti agilaklako kenkuana ti baka.
Naamoan a saan a ginatang ni Valentin dagiti baka ngem ketdi dagiti kabarangayan na metlaeng iti balor a nasurok 50 a ribo a pisos.
Innayun ni Kag. Pascua a kalpasan a nakumpirmaran da a ti menor de edad ti nagtakaw ket nagkamang da a dagus iti pulisya tapno masolbar iti nasao nga isyu.
Inbatad na a bayat nga adda da iti stasyon ket dita nga inadmitir ti suspek ti inaramat na a panagtakaw ken naamoan nga isuna metlaeng ti nagtakaw iti Brgy. Nalbo itay kallabes.
Kabaytanna, kinumpirmaran ni Mr. Junjun Esteban nga isuda iti kabsat na ti gimmatang ti dua a baka a saan da nga inpagarup a naggapo iti takaw.
Inlawlawag ni Esteban a naklaat da lattan iti kabsat na idi adda dagiti nagturong a pulis iti pagtaengan da.
Kuna na nga idi Nobiembre 28 ket nagturong iti pagtaenganda ti menor de edad a suspek tapno ipasirig na dagiti lako na a baka.
Inbatad na a gapu ta agsapsapol da ti taraknen da a dingwen ket ginatang da iti manong na dagiti dua a baka.
Kuna na nga nasurok 60 a ribo ti umuna a presyo ti suspek ngem tinawaran da daytoy isu a nagbalin a 51,000.
Nu pay kasta, inlawlawag na a 50,000 laeng ti inpauna da ken ti sangaribo a pisos ket ited da laeng nu maited met kadakuada ti papel dagiti dingwen.
Kabayatanna, inpakaamo ni Esteban nga addan ti immuna a panangilako kadakuada ti suspek ti baka ngem adda ti inted na a dokumento.
Innayun na a nabayag dan nga aggam-ammo ngem saan na nga inpagarup a takaw ti inlako ti suspek kadakuada.
