LAOAG CITY – Napasamak manen ti nagsaruno a panagbettak ti wangawangan ti Kilauea Volcano idiay Big, Island.
Segun ken ni Bombo International Correspondent Manny Pascua, napasamak ti umuna a panagbettak agarup alas 12:46 itay parabangon ken nasarunuan itay oras alas 4:43 iti nasao met la a kanito.
Kuna na a nangitunda dagiti nagsaruno a panagbettak ti kangato iti naipuswak a dapo ken asok nga immabot iti agarup 10 a ribo a kadapan.
Malaksid iti nasao a pasamak, napasamak manen ti ginginned a nagpigsa iti 5.4 magnitude ngem awan iti napasamak a tsunami.
Mainaig iti daytoy, inbatad ni Thelma Domingo, tubo iti Pangasinan ngem agnanaed iti Pahala Town nga agtalinaed a nakaserra dagiti pagtaengan da gapu iti nasao a sitwasyon.
