LAOAG CITY – Inyuswat ti PNP-San Nicolas ti nagsina a search warrant operation iti pagtaengan dagiti agkabsat iti Barangay San Pablo iti ili ti San Nicolas.
Basar iti search warrant, biruken dagiti otoridad ti maysa a kalibre 45 iti pagtaengan ni Aldwin Asuncion y Gumayagay, maysa a mekaniko.
Nupay kasta, negatibo ti resulta ti operasyon wenno awan ti nakita da iti pagtaengan ni Aldwin.
Nagkedked metten a nangipaay ti komento ni Aldwin mainaig iti pannakiyuswat ti search operation iti pagtaengan na.
Namunganay ti operasyon iti pagtaengan ni Aldwin iti report a maipagarop nga adda kenkuana ti paltog a nausar iti napasamak a pammaltog iti napalpalabas a tawen.
Sumaruno ket nagsukimat dagiti otoridad iti pagtaengan ni Stephen Asuncion iti nasao met laeng a barangay no sadinno ket nabirukan ti maysa nga homemade shotgun, uppat a bala ti 12 gauge shotgun, maysa a magazine ti 12 gauge shotgun nga addaan ti tallo a bala, lima a bala ti kalibre 45 a paltog, uppat a sachet ti maipagarop a shabu ken dua a sachet ti maatap a shabu residue
Nupay kasta, naglikudan na a kukua dagiti naala dagiti otoridad manipud iti pagtaengan na.
Inpetteng na nga adda ti dua a pulis a nakasibilyan nga ummuna a simrek dagitoy iti pagtaengan na sakbay a naibasa kenkuana ti search warrant manipud iti korte.
Rumrumuar a nakita a mismo ti asawa na a maipagarop a simrek dagiti dua a pulis iti kwarto ken linukatan da dagiti cabinet a nakaipanan dagiti lupot dagiti annak na.
Patien na a ditoy a gundaway a maipagarop nga inmula dagiti pulis ti paltog ken maatap a shabu.
Innayon na nga adda ti insuko na iti PNP-San Nicolas a kalibre 45 a paltog.
Kabayatanna, inlawlawag ni Police Major Joseph Baltazar, ti chief of police ti PNP-San Nicolas a nakasuot ti body camera dagiti pulis a nangiyusat ti search warrant operation iti pagtaengan ni Stephen Asuncion iti Barangay San Pablo iti ili ti San Nicolas.
Segun kenni Baltazar, ipresentar da amin dagiti ebidensya ken ti naala ti body camera da iti korte para iti pannakapila ti kaso kontra kenni Asuncion.
Mainaig iti daytoy, kunana a ti panagnegatibo ti operasyon iti pagtaengan ni Mr. Aldwin Asuncion ti pakakitaan a lehitimo ti insayangkat da ken saan da nga agimulmula ti ebidensya a kas iti akusasyon dagiti agbalbalin a subject.
Inbatad na a namunganay ti operasyon gapo iti report a dagiti agkabsat ket maipagarop nga agpappaputok ti paltog no adda da iti impluwensya ti nasanger.
Malaksid iti daytoy, maysa pay a rason iti pannakaiyuswat ti operasyon ket karaman dagiti agkabsat iti napasamak a pammaltog iti napalpalabas a tawen.
Kabayatanna, kunana nga awan met pay ti impormasyon na nga adda ti insuko dagiti agkabsat a kalibre 45 a paltog iti kwerpo ti pulisya.
