LAOAG CITY – Inpakammo ni Vice Mayor Jonathan De Lara a nakaawid aminen dagiti naibakwit iti ili ti Solsona kalpasan a simmayaaten ti sasaaden ti panawen.
Segun kenni De Lara, itay agsapa ket dagus a nangiwayat da ti clearing operations ken amin a paset ti National roads iti nasao nga ili ket mabalinen a madalyasatan.
Inbatad na a timmulong ti lokal a gobierno ken dagiti maseknan nga ahensya kas iti Local Disaster Risk Reduction and Management Office nga agdalos nangruna ket adda dagiti pagtaengan a natulidan ti kaykayo.
Inpasigurado ti bise mayor a nakasagana da a tumulong kadagiti naapektaran iti bagyo.
Iti agdama ket ur-urayen da ti reports no mano ti balor dagiti nadadael iti benneg ti agrikultura ken imprastraktura.
Kabayatanna, agpapan ita ket isolated pay laeng ti sitwasyon ti Barangay Nalasin ken Barangay Lipay ken ipaayan da met ti tulong dagiti residente.
