LAOAG CITY – Naaprubaranen iti maikatlo ken maudi a panagbasa iti kamara de representantes ti House Bill (HB) No. 10270 wenno Career Progression System for Public School Teachers Act a gagem ti mangbuwangay ti career progression system para iti primary, secondary, ken senior high public school teachers.
Umabot iti 197 nga agpanpanday linteg ti nagbotos pabor iti pannakaipasa ti nailungalong a gakat nga inisponsoran da Tingog Party-list Reps. Yedda Marie Romualdez ken Jude Acidre, karaman ni dati a Batangas Rep. Ralph Recto nga agdaman ket sekretaryo ti Department of Finance (DOF).
Iti statement ni House Speaker Martin Romualdez, inbatad na a ti pannakaipasa ti nasao a gakat iti Kamara de representantes ket pammaneknek iti kalikagom da a maipangato ti lebel ti panagisuro dagiti mangisursuro iti babaen ti panangipaay kadakuada ti nalawag a promotion system.
Iti met biang ni Rep. Yedda, kunana a mangnamnama a trataren a dagus daytoy ti senado tapno maipasa ti gakat para iti pagsayaatan dagiti mangisursuro.
Kalpasan a mapagbalin a naan-anay a linteg ti gakat ket mamandar ti Department of Budget and Management (DBM) a mangbukel ti lima a baro a posisyon ken mangipaay ti salary grade para iti Teacher IV, V, VI, VII ken Master Teacher V.
Mabalin a maipromote dagiti mangisursuro basar iti resulta ti Comprehensive Performance Assessment da, karaman dito ti merit, fitness ken competence.
Iti kanito pay a mapagbalin a linteg ti gakat ket agbalinen a patas ti promosyon dagiti mangisursuro ken saanen a maibasar no adda ti bakante a posisyon.
