LAOAG CITY – Inpakaammo ni Dr. Alan Taylan, Internal Medicine iti St. Camillus De Lellis Hospital ditoy siudad ti Laoag a dakkel ti posibilidadna a dagiti naipasngay a nalukmeg ket narigaten a kumuttong.
Nupay kasta, inlawlawagna a nakadepende iti maseknan nga indibidual no kasano ti wagas ti pannanganda iti inaldaw-aldaw gapu ta dakkel ti agbalin nga epektona daytoy iti timbangna.
Inbatadna a nabayagen nga adda ti genetic factors ti panaglukmeg no sadinno a posible a matawid ti kinalukmeg ti anak manipud kadagiti nagannak kenkuana a datin a nalukmeg.
Mainaig iti daytoy, kuna ni Dr. Taylan a dumanonen iti 37 a milyon dagiti maibilang nga obese wenno sobra ti kinalukmegna no sadinno a rumrummuar iti panagadal a nadoble ti bilang dagiti nalukmeg a tattao.
Kunana a masapol a taripatoen a naimbag ti maysa nga ina ti salun-atna kabayatan ti panagsikogna tapno saan a maapektaran ti ipasngayna nga anak.
Innayonna a masapol ti regular a panag-check up nangruna kadagiti nalulukmeg gapu ta dagtioy ti kangrunaan a makapasar ti heart problem, diabetes, heat stroke ken dadduma pay.
