LAOAG CITY – Saan a kinontra dagiti Senador ken dagiti Kongresista iti naisingasing a timeline ni Senate President Chiz Escudero para iti impeachment trial kontra ken ni Vice President Sara Duterte.
Segun ken ni Escudero, kalpasan nga inpatulodna ti surat para iti nairekomendar nga iskedyul iti impeachment trial ni Duterte ket awan ti nangipeksa ti negatibo wenno nag-object iti proposed timeline.
Inbatadna a nagsurat payen ti Kamara kenkuana a nangipasimudaag a naawatdan ti insingasingna a timeline ken awan met ti nangibaga ti panangkontra wenno reservation ditoy dagiti Kongresista.
Malaksid iti daytoy, adda dagiti Senador ti nangipeksa ti suporta ngem babaen daytoy ti informal.
Iti timeline ni Escudero, agsubli ti sesyon dagiti agpanpanday linteg inton Hunio 2 ken aprobaran ti iskedyul ken kabigatanna, Hunio 3 ket ag-convene ti Senado kas impeachment court a mangipasimudaag ti panangrugin ti proseso.
Nammoan nga inton Hulio 30 ket ti aktual nga impeachment trial kontra ken ni Bise Presidente Sara kagiddan ti panagserrek ti first regular session ti 20th Congress.
