LAOAG CITY – Umaboten ti nga 40 dagiti naisyuan ti citation ticket mainaig iti panagsalungasing ti provincial ordinance, seknan ti ilegal a quarry operation ditoy probinsya.
Daytoy ti inbatad ni PCpt. Tolentino F. Erum Jr. ti mangidadaulo ti Provincial Special Enforcement Team ti Ilocos Norte Police Provincial Office.
Segun kenkuana, dagiti naisyuan ti citation ticket ket babaen dagiti nagduduma a naiwayat nga illegal quarry operation iti nagduduma nga ili ken ciudad.
Kuna ni Erum nga adda mandar ni Provicial Director PCol. Frederick Obar iti Ilocos Norte Police Provincial Office a mapaigetan iti panagmonitor da kadagiti agisaysayangkat ti ilegal quarry ditoy probinsya.
Gapu iti daytoy, ket naammuan a babaen ti kaudian a pinagmonitor da iti Brgy. 34 Cabaruan Bacarra, ket addada manen naisyuan ti citation ticket, dua a lallaki, agtawen ti 28 ti maysa kadakuada, awanan asawa, driver ti ten-wheeler truck, ken residente ti Barangay Barangobong iti ili ti Nueva Era, bayat a ti maysa ket agtawen ti 24, payloader ken residente iti Barangay San Isidro iti ili ti Sarrat.
Mainaig iti daytoy ket agdama nga adda iti biang ti Barangay Cabaruan iti ili ti Bacarra, dagiti heavy equipments nga inusar da.
Kabayatanna, naammuan a ti pannaka-isayangkat ti quarry operation ket babaen met laeng ti mandato ni Governor Matthew Marcos Manotoc.
