LAOAG CITY – Nakababain kadagiti maim-imbitaran nga hurado iti Tan-ok festival of all Festivals ditoy probinsya a maak-akusaran a bias da wenno adda ti pabpaboran da.
Daytoy ti nagbalin a reaksyon ni Mr. Ianree Raquel, ti Provincial Tourism Officer iti kapitolyo probinsyal mainaig iti nagbalin a rakurak ni Laoag City Mayor Michael Marcos-Keon a nagdesisyon a saanen a makisalip ti ciudad iti Tan-ok festival of all Festivals gapu ta bias dagiti hurado iti napalabas a tawen.
Inpaganetget ni Raquel a dagiti hurado nga im-imbitaran da ket namnamaen da a bagbagkaten da ti kredibilidad ken reputasyon da.
Immunan nga inlawlawag ni Raquel a ti Tan-ok Festival of all Festivals ket isu ti pakaitampukan dagiti selselebraran a fiesta iti kada ili ken ciudad ditoy probinsya.
