LAOAG CITY – Ibilang ni Police Captain Christian Felix, hepe ti PNP Pasuquin nga accident prone area ti nakadesgrasyaan dagiti dua a lallaki a nakalugan ti maysa a motorsiklo idi kalman.
Kuna na a possible a maikawa dagiti dadduma a motorista iti nasao a kalsada gapu ta no saan da a mapakadaan ket mapan da iti Brgy. Sapat.
Mainaig iti daytoy, inbatad ni Felix a ti kangrunaan a makagapu ti aksidente ket human error.
Daytoy ket gapu ta adda dagiti sabali nga iraprapin da bayat nga agmanmaneho da.
Inbunannag ni Felix nga awan met dagiti fatal accident a makagapu ti pannakaperdi ti makina, wenno mabettak ti ligay dagiti itur-turong da a behikulo.
Innayon na a nasken a nakasentro ti imatang dagiti driver iti panagmaneho da ken awan iti impluwensya ti nasanger.
Maipalagip a natay ni Belmark Etol a tubo iti siudad ti Zamboanga ken agnanaed iti Brgy. Barit ditoy siudad ti Laoag ken nasugatan ti menor de edad a nakalubbon iti nagluganan da a motoriklo.
